മഴ

പെരുമ്പറകൊട്ടും പോലൊരു സംഗീതം,
ഞാനിന്നാസ്വദിച്ചു.
ഉരുക്കു മേല്‍ക്കൂരയിലാഞ്ഞടിച്ച മഴത്തുള്ളികള്‍,
തടയാനേല്‍പിച്ച കരിങ്കല്‍പാറകളില്‍
തലയടിച്ചമരുന്ന,
തിരമാലകളെയോര്‍മ്മിപ്പിച്ചു.
പരന്നു കിടക്കുന്ന മേല്‍ക്കൂരയില്‍,
ഊക്കില്‍ വീണു പരന്നൊഴുകി,
കോണുകളിലൂടെ ചാലിട്ടൊഴുകി,
ചെളിയും ചേറും കഴുകിക്കൂട്ടി,
അഴുക്കു ചാലു തേടി ആര്‍ത്തലച്ചു,
ചെറു പുഴയായൊഴുകിത്തീര്‍ന്നു.

സംശയം!

കേള്‍ക്കുക എന്നാല്‍ എന്താണ്?
കാണുക എന്നാലോ?
കണ്ടാലും കേട്ടാലും,
കാണാത്ത, കേള്‍കാത്തവനെ
എന്ത് വിളിക്കും?
കണ്ണില്ലാത്തവനെന്നോ?
കാതില്ലാത്തവനെന്നോ?
മന്ദബുദ്ധിയോ?
കുരങ്ങനോ?
അതോ ഗോര്‍ബചെവോ?